本帖最後由 HZ8186 於 2022-4-19 23:04 編輯
-- Preamble --
喺愛爾蘭行咗兩日半之後, 小弟係時候翻英國面對現實寫論文, 而今次小弟會乘搭 Ryanair 由 Dublin (DUB) 前往 East Midlands (EMA)。 今次係小弟第一次搭 Ryanair, 亦係小弟第一次搭 NG 版本嘅 Boeing 737。本身小弟係唸住回程飛 Aer Lingus 前往 Birmingham 或 Manchester, 唯見到 Ryanair 有一班早上九點到 East Midlands 嘅航班, 翻到英格蘭仲可以趕得切翻教會早堂, 咁今次就 "I go to school by Ryanair" 啦~~
今次除咗講飛行體驗同感受之外, 小弟亦會借呢個機會講下少少關於 Ryanair 嘅 '豐功偉績', 同小弟對 Ryanair 嘅睇法, 希望大家鐘意啦~~
-- Flight Info --
FR534 DUB-EMA EI-GJS Boeing 737-800 STD 0805 ATD 0810 STA 0910 ATA 0900
-- 壞人航空有名你叫? --
就算閣下未去過歐洲，相信讀者都會曾經聽過 Ryanair 瑞恩航空 嘅 ‘風光事蹟’ 啦 - 向於機場櫃檯辦理登機的乘客收取巨額手續費，用極度具 '創意' 嘅合約聘請員工，向嘗試更改航班嘅顧客收取應該夠俾首期嘅手續費，甚至為曝光而由集團總裁發出新聞稿表示將會為機上洗手間設收費 - 小弟亦常常同朋友笑稱 - 呢間無疑係一間戰狼航空。
即使如此，'戰狼航空' 至今依然係一間營運中嘅航空公司，正正代表呢間航空公司同佢嘅營商策略某程度上係得到乘客嘅認同，畢竟乘客嘅身體是誠實的。適逢小弟今次剛好遇上一個適合嘅航班時間同機票價格，小弟決定親身試下呢間航空公司嘅服務，順便睇下小弟會唔會俾呢間航空公司出征啦~~ -- 唔壞唔搭 --
小弟當日早上五點半起身, 簡單食咗早餐同喺青年旅館 Check Out 後, 小弟就搭巴士前往機場。Dublin 嘅機場巴士係有分快慢 - 由於都柏林嘅市郊係經常會塞車, 通常當地居民係會建議閣下乘搭 747 號機場巴士出入機場 避開繁忙路段, 唯由於小弟於清晨時份前往機場, 所以小弟則選擇乘搭分站比較近旅館嘅 42 號巴士前往機場。
三十分鐘後，巴士將小弟準時送到都柏林機場一號客運大樓門外 - 由於小弟喺英國出發前已經喺網上預先辦理登機手續，以及小弟當日並無寄艙行李，小弟到達機場後喺離境層徘徊咗一陣，便穿過安全檢查進入禁區。喺距離登機時間尚有四十五分鐘嘅情況下，小弟便決定趁機遊覽 Terminal 1 & 2 嘅 Airside，睇下都柏林機場有的咩提供啦~~
二號客運大樓係處理跨大西洋嘅航班為主，而設施配套亦相當齊全，惟由於小弟當日於早上七點到訪，因此大部份餐廳同商舖都未營業，而小弟只好喺呢個客運大樓欣賞其設計同設施。呢個客運大樓喺 2010 年落成，而除咗設計現代之外，二號客運大樓亦設有一個美國 Border Preclearance 嘅設施，容許旅客登機前 先辦理入境美國嘅手續，抵達美國後可以進入美國，省卻於美國嘅目的地等候辦理入境嘅時間。反觀，一號客運大樓則平實得多 - 呢個客運大樓負責處理進出都柏林嘅廉航航班，而室內設計係以實用性為首。雖然客運大樓嘅設計未有如 T2 般嶄新，不過室內設有大量候機空間，而整體上亦非常清潔。
(歐洲現時只設有兩個美國嘅 Border Preclearance 設施，而另外一個位於同屬愛爾蘭嘅 Shannon - 雖然 BA1 已永久停飛，不過據小弟理解依然有少量航班使用呢個設施嘅。)
早起嘅鳥兒有飛機搭? - Ryanair 喺 DUB - EMA 航線上提供每星期十班航班，而小弟則選擇當日早上八點嘅班次。雖然航班時間偏早，不過今日嘅航班目測都有九成滿嘅。
雖然都柏林機場喺早上都相對繁忙，不過其安全檢查嘅速度真係令小弟大失預算 - 小弟原先預留半小時通過安全檢查，惟當日基本上係唔駛排隊咁滯，而小弟最後亦好好善用呢個半小時喺兩邊客運大樓散步。
通過安全檢查後，當然要 <del> 見字飲水 <del/> 補充水分啦 - 香油箱式自助賣水係歐洲係相當常見嘅。
由於小弟有一小時候機時間，小弟去咗較新落成，處理傳統航空公司航班為主嘅二號客運大樓。呢個客運大樓設有美國嘅 Border Pre-Clearance 設施 - 前往美國嘅乘客可以先辦理入境手續，到達美國後只需進行海關申報便可入境。
另一邊廂，處理廉價航空公司航班為主嘅一號客運大樓就比較平實 - 有海量嘅候機空間之外，商舖價錢亦相對無咁離地。
-- FR534 DUB-EMA --
喺都柏林嘅兩個客運大樓都留低腳毛之後，小弟前往閘口登機 - 雖然今日執飛航班嘅 B737-800 已經停泊喺客運大樓前面，不過閘口人員檢查機票同目測手提行李大小後，乘客唔係用登機橋登機，而係先行樓梯落停機坪地面，再用 737 上自身配備嘅樓梯登機。呢個係瑞恩航空嘅特點之一 - 旗下嘅 B737 全部都配有呢個可以自動伸縮嘅樓梯 - 可以減少於目的地機場租用登機樓梯嘅費用，亦可以減少航班準備嘅時間。(留意瑞恩航空嘅 B737-800 只為機頭嘅艙門安裝樓梯 - 於機尾登機嘅乘客係使用機場提供嘅樓梯登機嘅)
今日航班由起飛到降落都非常準時 - 飛機喺早上八點正 pushback ，用少少時間滑行後 便向東起飛，跨過愛爾蘭海並飛越利物浦，曼徹斯特等城市，往今日目的地 East Midlands Airport 進發。
今日航班上嘅 Inflight Service 則比較特別 - 由於今日航程只有五十分鐘，當飛機依然喺閘口準備 pushback 同排隊起飛嘅時候，機組人員已經開咗 PA 叫乘客落單。若乘客希望購買熱食嘅話，機組人員先開始把食物加熱，待飛機進入巡航高度後就立即把食物送上。不過，由於航程偏短，今日可供機上選購嘅食物種類亦相當有限 - 基本上今日航班上只有三種三文治，以及基本嘅薯片，朱古力條等小食提供。
另一個比較特別嘅安排則源自 Ryanair 嘅付款安排 - 同其他航空公司比，瑞恩航空係少數會容許乘客於機上用現金付款嘅航空公司之一，適逢當日小弟有少量歐元用剩，小弟就喺機上買咗杯熱茶醒神 - 雖然三歐買一杯茶未必係最划算，不過手握一杯熱茶，俯望愛爾蘭海同英格蘭北部城鎮喺下面劃過，聽下 enya 嘅 Dark Sky Island，的確係一件幾詩意嘅事嚟嘅。
小弟亦喺呢度評論 Ryanair 嘅機艙配置同座位啦 - 雖然瑞恩航空係其網站表示其座位座距 (Seat Pitch) 只有 29'，不過由於座椅椅背纖薄，只要閣下身高低於一米八 閣下真係無需擔心座椅間距問題。另外，瑞恩航空嘅機艙設計亦有別於其他同類 737 - 除咗用一張貼紙於椅背展示安全資訊之 (以取代安全卡) 外，同時，一般放置於座椅底部嘅救生衣喺放置於頭頂讀書燈同氣孔旁 - 某程度呢個係一個德政嚟 - 呢個係可以增加座位下方嘅空間之餘，同時亦可也減少乘客無意或故意取走救生衣嘅機率。
轉眼間，航班已經飛越 Peak District 到達 Derby 上空，而機組人員亦隨即為降落準備。餘下嘅旅程亦非常順利 - 飛機於九點準時降落 East Midlands Airport，而降落後不足二十分鐘 小弟已經喺一部前往 Nottingham 嘅巴士，正式展開小弟四年留學生涯之中嘅最後一個學期。
乘搭 Ryanair 時，一個比較特別嘅乘客體驗就係閣下會由購買機票嘅一刻 到上機前一刻 無間斷地收到邀請閣下購買 Add-Ons 嘅廣告 - 無論係購買指定座位，機上膳食，寄艙行李，客艙行李， Ryanair 都會隔幾日電郵宣傳一次。 當然，呢個係 Ryanair 嘅 Business Model 嘅其中一部份 (小弟喺網上亦見過文章表示 Ryanair 可能有多達25% 嘅收入係嚟自 Ancillary Revenue)，不過小弟喺降落後 喺郵箱按 “Unsubscribe to all communications from Ryanair” 後，唔知點解係有一股 回復自由身 嘅感覺。
“Any time the plane spends on the ground, is time not earning money and time wasted” - 作為眾多廉價航空公司之中嘅佼佼者， Ryanair 當然會希望將飛機喺地面停留嘅時間減到最少啦 - 當日嘅 Ground Handling 係非常有效率，而小弟後來喺 flightradar 上查看，發現今日嘅航班由降落都柏林到起飛之間 只係相隔一小時而已，Block-On Time 甚至可能係四十分鐘都無。
Ryanair 可能係世上唯一一間會將安全資訊貼喺椅背後嘅航空公司 - 此舉可以防止乘客將安全卡從機上當咗紀念品取走，唯由於空間所限，安全資訊嘅圖像同字體嘅大小係偏細嘅。
另一個獨有於 Ryanair 機隊嘅安排 係圖中排得密密麻麻嘅 overhead panel - 乘客頭頂上除咗有氧氣罩, 閱讀燈, 通風口, Call Bell 等基本配置之外，一般會放於座椅底部嘅救生衣亦藏於呢個頭頂空間
愛爾蘭的確係一個非常漂亮嘅國家 - 雖然愛爾蘭嘅天氣同英國一樣 一般都係比較陰沉同潮濕，不過其山勢同海岸線係非常壯觀。受時間所限，今次小弟只係探訪 Dublin & Galway 兩個城市，不過若小弟擇日再前往愛爾蘭，必定會駕車環島一周。
雖然瑞恩航空喺其網站表示其座位座距 (Seat Pitch) 只有 29'，不過由於座椅椅背纖薄，只要閣下身高低於一米八 閣下真係無需擔心座椅間距問題。
的確用三歐買一杯茶未必係最划算，不過手握一杯熱茶，俯望英格蘭北部城鎮喺下面劃過，聽下 enya 嘅 Dark Sky Island，的確係一件幾詩意嘅事嚟嘅。
//那陣時不知道 置身的日子都發亮 眼光裡藏著的囂張 往後已不再同樣// 那陣時不知道 my little airport
麻雀雖小 五臟俱全 - East Midlands Airport 並不位於任何城市附近，而係選址英格蘭中部四個中型城市 Nottingham, Derby, Loughborough & Leicester 之間。雖然呢個機場係重視貨運航班為主，不過佢亦擁有頻密嘅巴士班次連接上述四個城市嘅。
-- 賽後檢討 --
今次嘅體驗可以話係不過不失，而係相當貼合小弟購買機票時 'You get what you pay for' 嘅預期。 雖然呢個一小時嘅航班上嘅乘客體驗並不能完全代表整個瑞恩航空網絡嘅乘客體驗 (例如其前往東歐及地中海等 航程長達四小時及使用遠離市中心嘅機場嘅航線)，不過如果閣下用一個搭長途巴士嘅心態看待呢個旅途，除咗航班上係會不斷播放乘客資訊/廣告嘅廣播之外，其實呢個體驗係可接受嘅。
小弟會唔會推薦閣下乘瑞恩航空呢? 呢個就比較視乎閣下嘅個性同行程篇排啦 - 如果閣下性格比較隨意 或者閣下行程比較鬆動嘅，而閣下又唔介意前往偏遠機場乘搭飛機嘅，喺價錢吸引嘅情況下 無疑 Ryanair 會係一個幾好嘅選擇 - 否則，小弟都係會建議閣下暫避呢間廉價航空公司啦。
-- 第二十五回 完 --
如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~
第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出 第二十一回 拜訪協和號試驗機 - Brooklands - 不日推出 第二十四回 EI283 LCY-DUB 尋找 Avro RJ 的故事 - 不日推出 第二十五回 FR534 DUB-EMA 初嘗瑞恩航空的故事
| 
樓主
