本帖最後由 HZ8186 於 2022-12-16 03:39 編輯
經過三年半嘅留學生涯之後,小弟眨眼間只餘下一個學期便完成在英的工程課程。趁新嘅學期尚未正式開始, 小弟決定於一月尾的週末走趟愛爾蘭,為最後一個學期開個靚頭,順便探訪一個"老朋友"。
前往愛爾蘭就當然要試試當地嘅航空公司啦 - 今日小弟會乘搭愛爾蘭航空 Aer Lingus EI283 由倫敦前往都柏林,而航班係由同樣嚟自愛爾蘭嘅航空公司 CityJet 營運。至於 ”老朋友” 係咩? 佢就係 EI-RJI,係一部二十一歲嘅英製四引擎短途客機 Avro RJ85。
註: 小弟於二零年十二月乘搭呢個航班,而文章主體則於二一年年中就已經寫好 - 為咗保持小弟當時 (疫情初期) 嘅觀點看法,小弟係沒有更改文章主體,惟小弟會喺文章中加上補充資料,希望大家諒解。
-- Flight Info --
EI283 LCY>DUB
EI-RJI British Aerospace/Avro RJ85
STD 0955 ATD 1105
STA 1045 ATA 1145
-- London City Airport (LCY) --
喺四年留學生涯間,小弟多次使用 London City 進出英格蘭,不經不覺間見證機場變遷。由有控制塔現場控制空中交通 到現在由位於 Swanwick 嘅虛擬控制塔遙控操控、由多年前一日兩班直接由 London City 跨大西洋前往紐約嘅航班變到今日一班 BA1/2 (後註:疫情下 BA1/2 最後都係取消告終)、由脫歐前繁華嘅景況到脫歐後慢慢衰落嘅情境、的確 London City Airport, 甚至整個世界都經歷許多變化 - 就睇下經歷諸多改變嘅 London City Airport 能夠帶嚟咩新嘅乘客體驗啦。
London City Airport 嘅乘客體驗依舊方便快捷 - 由倫敦市中心乘 DLR 前往機場只需二十分鐘,而步行五分鐘到離境大堂後,小弟只需五分鐘便已經把行李寄艙及辦妥登記手續。用十分鐘通過安全檢查後,小弟就抵達機場嘅禁區。由呢個位置出發,所有閘口都位於五分鐘步行距離內,而各商戶同食肆亦位於呢個中心位置。
經過多次裝修同擴建後, London City 禁區嘅乘客體驗果然有所提升 - 雖然中心位置並沒有太大變化,不過新翻新嘅閘口區域就顯得現代同舒適,而大量落地玻璃亦可以提升自然採光同空間感。值得一提嘅係 London City Airport 係一個完全沒有任何貴賓室幾機場 - 雖然呢個機場主要係服務商務旅客為主,不過受限於有限嘅禁區空間,呢個機場無論喺 Landside 或 Airside 都係沒有貴賓設施嘅。(不過英航旗艦航班 BA1/3 嘅乘客就幸福少少 - 英航會向其中一間餐廳留起餐檯供乘客使用,而前往紐約嘅乘客會獲邀前往呢個區域候機兼享用早餐)
小弟買咗杯咖啡便前往閘口登機 - 今日航班係使用一個巴士閘口,而乘客係需要先乘接駁巴士前往位於西端嘅停機坪再步行登機。今日航班只係半滿,而乘客好快便就座等候起飛。
-- The TATL Issue --
雖然今日嘅航班由 Aer Lingus 營運, 不過航機同機組人員皆由 CityJet 提供 - Aer Lingus 早前為擴展自己嘅英國網路,向同樣嚟自愛爾蘭嘅 CityJet 租下三部 Avro RJ 以營運 DUB - LCY 嘅航班。CityJet 嘅 Avro RJ 會添上 Aer Lingus 嘅色彩,而機上嘅服務亦跟隨 Aer Lingus 嘅歐洲短途航班睇齊。
呢個安排除咗可以加密 EI & BA 連接倫敦同都柏林兩個國家首府嘅班次之外,亦可以將倫敦嘅商業區同位於美洲各城市嘅距離拉近。希望由倫敦商業區直接飛往北美州嘅乘客自此可以用上呢個 "shuttle" 前往都柏林接連 Aer Lingus 強大嘅北美網路,而呢批乘客亦會受惠於都柏林嘅 Immigration Pre-Clearance Facility,同 BA1/3 般省卻到達美國後嘅入境時間。雖然之前乘客亦可以使用 BA CityFlyer 嘅航班來往 LCY 與 DUB,不過呢個舉動應該代表 Aer Lingus 會曠展呢個市場,並利用對都柏林嘅優勢廣展網路。(註: Aer Lingus 係由 British Airways 嘅母公司 IAG 全資擁有,並同 BA 設有不少航班共享協議,惟 EI 並非寰宇一家聯盟嘅一員。)
-- All things light and regional --
今日航班由 EI-RJI 執飛,係一部二十一歲嘅英製四引擎短途客機 Avro RJ85。Avro RJ 又名 BAe 146,為一部由 Hawker Siddeley (合拼後為 British Aerospace) 於七十年代中研發嘅英製四引擎短途客機。原為一個定位於螺旋槳飛機 (例如 Fokker 27, HS748 等) 同窄體噴射機 (例如 BAC1-11, B737 等) 之間嘅支線飛機,呢個設計好快便成為一個又有相當運載能力又具備短跑道升降能力嘅噴射客機。
呢個獨特嘅定位亦令 BAe146 獲得唔少航空公司青睞 - 澳航,英航,美航等航空公司全部都有使用過呢個機種,而其獨特嘅短跑道升降能力亦令呢部飛機成為服務 London-City, Stockholm-Bromma, Aspen 等機場嘅常客。British Aerospace 亦於 1993 年推出一個升級版 BAe 146, 配上改良版引擎以及升級儀器,並命名為 Avro RJ。
雖然 BAe146/AvroRJ 呢款飛機型號已日益式微,不過小弟亦有幸喺留學生涯遇上呢款飛機兩次 - 第一次係乘SWISS 嘅 RJ100 由蘇黎世前往倫敦,而第二次則乘 KLM 向 CityJet 租下嘅 RJ85 由百明翰前往阿姆斯特丹 - BHX-AMS 當日使用嘅飛機正正就係 EI-RJI,因此小弟今日踏上呢部 Avro RJ 嘅時候 莫名係有一股親切感嘅。
-- EI283 --
雖然今日航班由四個風筒推動,可惜呢四個風筒就吹唔走倫敦嘅壞天氣 - 遇上低雲層以及比較罕有嘅 09 Ops ,今日 London City 嘅航班有唔少都因為天氣而延誤,而 EI283 亦唔例外。航班得到批准起飛嘅時候,機師得悉目的地都柏林一個半小時後才有 Landing Slot ,繼而航班係遲咗足足一小時才關上機門,準備起飛。
Avro RJ 嘅起飛能力果然與眾不同 - 飛機滑行到跑道尾掉頭後,機師先把 Wheel Brakes 鎖上,緩慢地把四個引擎推至最大輸出。待引擎輸出穩定後,把 Brakes 鬆開,飛機如一把弓弩上的箭般衝前 - 飛機嘅速度急速提升,喺跑道中段已經 Rotate 及 Take-off,向愛爾蘭進發。
到達巡航高度之後,小弟便把椅背靠後,好好享受下呢個 Avro RJ 嘅旅程。今日小弟坐喺 11A - 呢個座位係揀得幾好,除咗適逢 B C 位都無人,可以一個人獨佔整排座位之外,呢個位亦可以見到機翼運作 - Avro RJ 除了採用 High Wing 設計之外,佢亦擁有較大嘅襟翼以及較大嘅 Aerodynamic Fairing,可以見到機翼如高達嘅關節咁開關其實都非常夢幻。
座椅嘅整體感覺亦不過不失 - 雖然座椅相當狹窄 (Avro RJ 嘅機身闊度只有 3.3m 闊,不過佢就如 A320 般採用一個 3-3 嘅座位佈局) 不過由於座位相當舒適,承托力幾好,喺大部份短途航班上呢個座椅絕對係無問題。惟飛機上嘅儲物空間則比較有限。除咗 Overhead Bin Locker 細小之外,座椅下嘅空間亦相對有限。遇上比較大件嘅行李或冬天時候披著大樓嘅時候,就要麻煩機組人員代為寄艙及借用衣櫃啦。
CityJet 嘅機上並沒有安裝娛樂系統,因而小弟嘅機上娛樂則變咗閱覽愛爾蘭航空出版嘅機上雜誌 ‘Cara’,順便研究都柏林落地後前往前往的景點。同時,今日航班只係提供 Buy On-board 服務 - 雖然餐單內嘅選擇都係以簡單嘢為主 例如 茶 咖啡 餅乾等,不過價格尚算合理嘅。
-- Dublin --
飛機好快就跨過愛爾蘭海進入繁忙嘅都柏林上空 - 喺 holding pattern 轉咗兩個圈之後,飛機喺 1145 於都柏林機場降落。經過五分鐘嘅滑行之後,飛機停泊喺一號客運大樓外嘅停機坪,呢個位置並沒有登機橋,而乘客係需要自行進入客運大樓嘅。小弟先到一個特別櫃檯檢查護照再進入 Arrivals Hall,購買一張 72 小時交通卡後 便展開小弟呢個三日嘅愛爾蘭之旅。
(雖然愛爾蘭同英國同屬 Common Travel Area,不過從英國抵步嘅乘客進入愛爾蘭前係需要先經過一個特別櫃檯檢查護照 - 呢個唔係辦理出入境手續,而純碎係一個檢查簽證嘅櫃檯。雖然兩國之間人民可以自由流動,惟兩國自己發出嘅簽證並非 100% 互通。由於小弟當時持學生護照進入英國並以遊客身份進入愛爾蘭,小弟嘅護照被蓋上一個 "不准於愛爾蘭工作" 嘅印章始獲放行。不過由於步行距離比較長,因此大家或要預留些少步行時間 - 雖然小弟當日係無須排隊,不過小弟由落機到出到 landside 都行咗二三十分鐘,大家或要多加留意。)
-- Conclusion --
今日嘅體驗係幾正面 - 雖然今日 Aer Lingus 嘅航班並非由 Aer Lingus 自己營運,不過乘客體驗則同 Aer Lingus 本身相當接近。 價錢方面,今日航班喺價錢方面都幾有競爭力 - 雖然小弟只係早三個月購買呢張機票,不過今趟航班只須 £45 就買到,連埋 £8 嘅訂位費,呢度折實港紙 $550 咗右。
最後就講定位 - 呢條航線係一條主打 ’方便’ 嘅航線 - 如果今日航班唔受天氣耽誤,小弟最快三小時就可以由倫敦市中心前往都柏林市中心,而小弟都見證到 London City 相比其他倫敦機場優勝之處,相信呢條航線會係唔少 business traveller 嘅首選。雖然小弟只係一個 leisure traveller,不過可以縮減來往機場嘅時間亦係一間好事,而閣下日後前往倫敦時都可以考慮使用呢個位於倫敦市中心嘅機場~~
位於倫敦嘅 Travel Zone 3,乘客可以使用 DLR 系統輕易往返機場及市區。呢個自動駕駛嘅輕鐵系統係相當可靠,並閣下可以前往 Canning Town 以及 Bank 兩個大站轉乘其他路線。
(後記: Crossrail/Liz Line 開通後,先乘鐵路到 Custom House 轉巴士或比於 Bank 轉乘 DLR 更快捷,呢點可以留意下)
順帶一提,論英國郵政代號嘅話,London City Airport 可以稱得上係唯一一個真正位於倫敦內嘅機場。London Southend, London Stansted 等機場當然只係 London-in-name-only,而 London Luton 及 London Gatwick 都位於倫敦環迴公路 (M25) 以外。而另一個位於 M25 內嘅 London Heathrow 則屬於 UB (Southall/Uxbridge) & TW (Twickenham) 兩個郵政代號區域,而今日嘅主角 London City 則屬於 E (East London)。
英國航空於 London City 除咗提供航班前往歐洲各大城市之外,亦會提供一個獨特嘅 Club World London City 服務前往紐約。掛上 BA 1/2/3/4 嘅航班篇號,英國航空會使用兩部全商務艙配置嘅 A318 營運呢個航線。
受限於 London City 起飛時嘅重量限制,以及有可能於大西洋上空遇上嘅氣流, BA1 並不會直接由倫敦飛往紐約 - BA1 會先飛往愛爾蘭西部城市 Shannon 做一個 technical stop,再跨越大西洋前往紐約。飛機於 Shannon 加油嘅時候,乘客會被邀請進行美國嘅 Immigration Pre-Clearance Check,而客機到達美國之後可以當作內陸航班處理 - 乘客通過海關檢查後就可以直接進入美國。
(後記: BA3/4 早於 2016 年因為客量而取消,而受疫情影響,英國航空於二零年三月宣佈暫緩 BA1/2 嘅航班,而航班於同年八月正式取消,為呢個營運咗十二年嘅航線畫上一個句號。)
翻新後嘅 Airside 相當新穎,惟受空間所限,商舖選擇依然係比較少。
今日嘅航班由 EI-RJI 執飛 - 雖然飛機披上 Aer Lingus 嘅機身顏色,不過飛機其實係由同樣嚟自愛爾蘭嘅 CityJet 營運。CityJet 亦將另外兩部 Avro RJ 披上愛爾蘭航空嘅顏色,以支援愛爾蘭航空嘅短途航線。
順帶一提,London City Airport 係一個 spotters 嘅福地 - 由於機場位於一個前船塢上建設,機場係有泰晤士河作一個天然嘅屏障,而機場並唔需要於外圍另外架設欄杆。呢個亦代表整個跑道及停機坪範圍都可以從對岸輕易拍攝,而飛機迷可以於對岸嘅長廊及大學範圍任意拍攝。今日既封面都係小弟早幾個月學用 1/30s 快門既時候影落既。
London City Airport 係沒有登機橋提供,而所有乘客都係於停機坪步行登機。雖然Avro RJ 係設有內置樓梯,不過當日並沒有使用到。
Avro RJ 喺 LCY 嘅起飛程序係相當獨特 - 飛機滑行到跑道尾掉頭後,機師先把 Wheel Brakes 鎖上 再緩慢地把四個引擎推至最大輸出。待引擎輸出穩定後,機師一把 Brakes 鬆開 飛機就如一把弓弩上的箭般衝前 - 飛機速度急速提升,而飛機到跑道中段已經 Rotate 及 Take-off。
如圖所見,Avro RJ 嘅內龍空間係相當有限 - 飛機嘅 Overhead Bin Locker 並非特別大,而 3+3 嘅座位排位係相當狹窄。生產商 BAe 係有提供 2+3 & 3+3 兩種座位排位供航空公司選擇,而雖然大多航空公司都係選擇使用後者,不過亦有航空公司使用 2+3 比較寬廣嘅座位排位 (例如 SWISS 等)。
CityJet 機上並沒有安裝娛樂系統,因此小弟嘅機上娛樂則變咗閱覽由 Aer Lingus 出版嘅機上雜誌 ‘Cara’,順便研究下都柏林落地後前往前往的景點。
//陪我迷上荒謬
越過幻變山丘
拾塊木碎伸手學施小魔咒//
林家謙 特倫斯夢遊仙境
CityJet 嘅網站標示今日客機座距為 31”,同 Aer Lingus 其他客機睇齊,惟由於座椅椅背比較厚身嘅關係,因此真正有嘅 legroom 係會比 Aer Lingus 稍遜嘅。
留意 CityJet 同 Aer Lingus 嘅協議亦包含少量其他短途航線,而閣下有機會喺 DUB-CDG & DUB-AMS 兩條航線上都會見到呢部 Avro RJ 嘅身影 - 不過由於航程唔係太長,相信對乘客整體體驗嚟講唔會有太大影響嘅。
雖然座位嘅寬度欠佳,不過張座椅本身係非常之舒服 - 座椅係用仿皮製造,而承托力係非常好。
儘管飛機嘅四副引擎全部都沒有裝上 thrust reversers,不過 Avro RJ 系列嘅降落表現係非常出色 - 飛機除咗配上 Carbon Brakes 之外,機翼上嘅襟翼同擾流器,以及機尾上嘅貝殼型擾流器亦有助飛機減速,容許飛機可以喺短至 1.2 公里長嘅跑道降落。
降落後,小弟獲邀參觀駕駛艙 - 雖然飛機於七十年代中設計,不過駕駛艙嘅設計都非常新穎,而機師對呢部二十一歲嘅飛機嘅表現都讚不絕口。
航班抵達都柏林之後都係沒有登機橋 - 乘客都係要步行落磯 跨越停機坪再進入客運大樓。雖然乘客並不需要辦理入境程序,不過乘客都要進行簽證檢查 檢查入境條件。
由於小弟當日沒有任何寄艙行李,因此小弟通過簽證檢查後便可直接進入 landside 離去。喺便利商店購買一張 72 小時嘅都柏林市郊交通卡後,小弟便乘搭機場巴士進入都柏林 展開小弟呢個四日三夜嘅愛爾蘭之旅。
四日後 小弟會乘 Ryanair 前往 East Midlands Airport 繼續學業,有興趣嘅可以睇埋之前推出嘅飛行報告~~
~完~
如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~
第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出 第二十一回 拜訪協和號試驗機 - Brooklands - 不日推出 第二十四回 EI283 LCY-DUB 尋找 Avro RJ 的故事 第二十七回 CX255 HKG-LHR 回到最初的起點 - 不日推出 第二十八回 BA1470 LHR-INV 北上的步伐 - 不日推出 第二十九回 LM391 LM398 EDI-KOI-EDI A Study of Tartans - 不日推出 第三十回 LM711 KOI-PPW-WRY-KOI 全球最短航班 - 不日推出 第三十一回 LX425 WK348 BHX-ZRH-HER 青出於藍的雪絨花 - 不日推出 第三十二回 BUC8336 HER-LNZ McDonnell Madness - 不日推出 第三十三回 EN8043 LNZ-FRA Air Dolomiti & 法蘭克福半日遊 - 不日推出 第三十四回 LH796 FRA-HKG 再一個歸家的故事
|